Suid-Soedan, Soedan besluit oor oliegeld

2012-08-04 09:45

Kaapstad – Oud-president Thabo Mbeki, die Afrika Unie se bemiddelaar in die Soedan, het aangekondig dat 'n ooreenkoms tussen Soedan en Suid-Soedan bereik is oor olie-inkomste, het RSG Saterdag berig.

Die geskil oor die verdeling van inkomste dreig sedert die begin van die jaar om in 'n oorlog te ontaard.

Mbeki sê daar sal ook binnekort gekyk word na die hervatting van olie-uitvoere na die noorde.

Hy het in Addis Abeba gepraat. Hy sê alle kwessies is bespreek en opgelos, maar wou nie verder uitwei oor die besonderhede van die ooreenkoms nie.

Soedan en Suid-Soedan het nog nie dié aankondiging bevestig nie. Suid-Soedan het olie-produksie in Januarie gestaak nadat hy en Soedan nie 'n ooreenkoms kon bereik oor die vervoerkoste van olie nie.

Die geskil het altwee lande tot op die rand van bankrotskap gedryf.

Volg Nuus24 op Twitter.

– RSG