Strafhof verwys Malawi na VN
2011-12-13 11:23
Den Haag – Die internasionale strafhof (ISH) het Maandag gesê hy verwys Malawi na die Verenigde Nasies se Veiligheidsraad nadat dié land geweier het om pres. Omar al-Bashir van Soedan in hegtenis geneem.
Bashir word deur die ISH gesoek op aanklagte van volksmoord.
Die ISH het ‘n lasbrief vir die inhegtenisneming van Bashir uitgereik.
Volgens die Verdrag van Rome, wat die lidlande van die hof onderteken het, was Malawi verplig om Bashir in hegtenis te neem toe hy die land besoek het.
Op 15 Oktober het Bashir egter ongehinderd ‘n vergadering saam met ses ander staatshoofde in Malawi bygewoon en later terug na Soedan vertrek.
Die hof het Maandag gesê dat “die Republiek van Malawi geweier het om saam met die hof te werk deur nie vir Omar al-Bashir in hegtenis te neem en aan die hof uit te lewer tydens sy besoek aan Malawi nie.”
Die hof het “besluit om die saak na die Verenigde Nasies se Veiligheidsraad te verwys.”
Bingu wa Mutharika, die president van Malawi, het voorheen gesê leiers van Afrika moet nie na die ISH geneem word vir misdade wat in Afrika gepleeg is nie.
– Volg Nuus24 op Twitter.
- Sapa - AFP