Staking in Zim vir een dag gestop
2012-01-25 16:57
Harare – Vakbondleiers in Zimbabwe het die staking wat veral skole erg raak, tydelik opgeskort, het RSG berig.
Staatsdiensamptenare eis dat hulle salarisse verdubbel word.
Tendai Chikowore, 'n vakbondwoordvoerder, het gesê die staking word slegs Woensdag vir een dag opgeskort, afhangend van wat gebeur tydens samesprekings met regeringsamptenare.
“Vakbondverteenwoordigers sal ná die vergadering besluit of die staking afgelas word en indien nie, sal dit Donderdag voortgaan,” het sy gesê.
Staatsamptenare eis 'n 100% salarisverhoging vir laagsbesoldigde werkers.
Die staking het daartoe gelei dat skole gesluit het, maar regeringsdepartemente gaan normaalweg voort.
– Volg Nuus24 op Twitter.
– RSG