Somaliese rebelle is agter Uganda-bomaanval
2010-07-13 03:31
Kampala – 'n Somaliese militante groep wat bande met Al-Kaïda het, het Maandag verantwoordelikheid aanvaar vir die dodelike bomaanvalle in Uganda se hoofstad tydens die eindstryd van die Wêreldbeker-sokkertoernooi.
Minstens 74 mense is tydens die aanval oorlede. Dit is deur rebelle van die Al-Shabaab by twee restaurante in Kampala geloods terwyl massas mense die eindstryd van die Wêreldbeker-sokkertoernooi gekyk het.
Die aanvalle het ‘n verinternasionalisering van Somalië se twee dekade lange burgeroorlog, gemerk.
"Ons het die aanvalle geloods omdat ons oorlog voer teen hulle,” het Mohamoud Rage, die Shabaab-groep se woordvoerder gesê.
Dié stelling kom nadat Uganda bygedra het tot magte van die Afrika Unie wat die Somaliese regering in hierdie burgeroorlog ondersteun.
Volgens Kale Kayihura, ‘n plaaslike polisiehoof, is drie ontploffings in die stad geloods. Een was glo as gevolg van plofstof wat in 'n gebou geplant is, maar die ander twee was moontlik weens selfmoordbomaanvalle.
Volg Nuus24 op Twitter.
- SAPA