Somaliese joernalis agter tralies oor 'vals inligting'
2011-07-02 17:59
Mogadisjoe – 'n Hof in Somalië se Puntland-streek het Saterdag 'n joernalis tot 'n jaar se tronkstraf gevonnis omdat hy vals inligting gepubliseer het.
'n Kollega het protes aangeteken en gesê die joernalis se verhoor was nie regverdig nie.
Feisal Mohamed Hassan, wat vir die Hiiraan-webwerf werk, is Donderdag in hegtenis geneem en daarvan beskuldig dat hy vals inligting oor plaaslike owerhede gepubliseer het.
"Die joernalis het nie 'n regverdige verhoor gehad nie," het 'n kollega van Hassan, wat gevra het om nie geïdentifiseer te word nie, aan die nuusagentskap AFP gesê.
"Sy prokureur is stilgemaak en die regter het glad nie na sy argumente om die onskuld van die joernalis te bewys, geluister nie," het hy bygevoeg.
Somalië is een van die wêreld se gevaarlikste lande en verskeie joernaliste is al in die Puntland-streek deur owerhede aangehou.
– Volg Nuus24 op Twitter.
- Sapa - AFP