Somaliërs gaan Amerikaanse tronk toe vir seerowery
2011-08-24 17:29
Washington – Twee Somaliese mans is Maandag tronkstraf opgelê en gaan die vonnis vir die res van hulle lewens in ‘n Amerikaanse gevangenis uitdien.
Hulle is gevonnis vir die rol wat hulle gespeel het in die kaping van ‘n seiljag wat tot die dood van twee Amerikaanse paartjies gelei het.
Ali Abdi Mohamed (30) en Burhan Abdirahman Yusuf (31) het skuld erken vir die kaping van die S/V Quest-boot aan die Somaliese kus.
“Hierdie vonnisse stuur ‘n boodskap aan enigiemand wat hulle aan soortgelyke oortredings skuldig maak,” het Neil MacBride, 'n Amerikaanse prokureur, in ‘n verklaring gesê.
‘n Groep Somaliese en Jemeense seerowers het die seiljag op 18 Februarie gekaap. Hulle het aan boort gegaan met die doel om vir ‘n moontlike losprys te onderhandel. ‘n Skietgeveg het egter uitgebreek, waartydens die vier Amerikaners dood is.
– Volg Nuus24 op Twitter.
- Reuters