Somalië bereid om seerowers amnestie te gee
2012-08-03 13:06
Video - SA gyselaars tuis
Bruno Pelizzari en Debbie Calitz, wat deur Somaliese seerowers ontvoer en verlede week vrygelaat is, is terug in Suid-Afrika.
KYK
Londen – Pres. Sharif Sheikh Ahmed van Somalië het gesê seerowers van dié land kan amnestie gegun word indien hulle gyselaars vrylaat en vaartuie aan hul eienaars terugbesorg, berig die London Times.
“Diegene wat bereid is om hul verlede agter te laat, sal vergewe word,” het dié staatshoof gesê.
“Die regering wil dit duidelik stel dat die deure oop is indien hulle wil inkom," het hy bygevoeg.
Ahmed is in 'n verslag van die VN, wat vroeër vandeesmaand uitgelek is, verbind aan beweerde korrupsie. Dié verslag vra dat die veiligheidsraad sanksies aan korrupte leiers moet oplê.
Dié verslag beweer dat Ahmed ‘n diplomatiese paspoort aan Mohammed Abide Hassan, hoof van die seerowers, gegee het as ‘n lokmiddel om sy netwerk te verklein.
Ahmed het die bewerings afgelag en gesê hy was nie bekommerd oor enige sanksies nie.
Altesaam 245 gyselaars word tans deur seerowers aangehou en die Europese Unie se taakmag teen seerowers glo dat minstens sewe gekaapte vaartuie ook nog in die seerowers hande is.
Abdiweli Mohamed Ali, premier van Somalië, het belowe dat die seerowers nie “met moord sou wegkom nie,” maar dat die regering bereid is om ‘n kompromie aan te gaan.
“My filosofie is dat mens nooit vrede deur geweld sal bereik nie,” het hy gesê.
“Daar sal van my kant af geen genade teenoor wees nie, maar as iemand opgee en om vergifnis vra, dan moet ons dit doen.”
– Volg Nuus24 op Twitter
- AFP
