Somalië: Spanning loop hoog tussen soldate, rebelle
2011-11-21 14:06
Nairobi – Die Somaliese al-Shabaab-rebelle het Sondag gewaarsku dat hulle Ethiopiese troepe "se nekke sal breek” nadat gerugte die ronde begin doen het dat Addis Ababa honderde soldate na Somalië gestuur het.
“Soldate van ons vyand, die swart kolonialis van Ethiopië, het Saterdag in ons streek inbeweeg. Maar hulle maak ons nie bang nie,” het Sheikh Yusuf Ali Ugas, die rebelle-groep se bevelvoerder vir die Hiran-streek, gesê.
“Ons sal die nekke van die indringers breek... Ons troepe is reg vir enigiets as die Ethiopiese vyand ons wil aanval,” het Ugas op die groep se radiostasie, Al Andalus, gesê.
Ethiopiese troepe het in konvooie van vragmotors en gepantserde voertuie suidelike en sentrale streke van Somalië ingeval, het plaaslike stamleiers gesê. Addis Ababa het egter die gerugte ontken.
– Volg Nuus24 op Twitter.
- Sapa - AFP