Somalië: Ontploffing eis agt lewens

2010-09-01 23:59

Mogadishu – Agt mense is Dinsdag dood en 14 buspassasiers beseer toe ‘n bom langs die pad ontplof het.

Volgens die busdrywer, Ahmed Adma, was daar oral bloed en liggaamsdele te sien.

Adma het na die ontplofing sy bewussyn verloor maar is nie ernstig beseer nie.

Die hoof van die ambulansdiens, Ali Muse, het bevestig vyf mans en drie vroue is in dié ontploffing dood.

Daar word geglo dat die Somaliese militante groep Al-Shabaab vir dié ontploffing verantwoordelik is.

Al-Shabaab het vroeër met ’n aanval op Mogadishu gedreig.

Volg Nuus24 op Twitter.