Somalië: Kinders ly die ergste
2011-08-03 08:20
Mogadisjoe – ’n Paar honderd Somaliese vlugtelinge het vir die eerste keer in maande vandeesweek behoorlike mediese en voedingshulp gekry danksy ’n noodlenigingspoging uit Suid-Afrika.
Van vroegdag af het ma’s en pa’s met veral babas begin toustaan waar die Suid-Afrikaanse span ’n tydelike kliniek en voedingsentrum in ’n bouval in die Howl-Wadaag-gebied in Mogadisjoe ingerig het.
Dokters en dieetkundiges het die siekes in groepe verdeel – dié wat meer intensiewe mediese hulp nodig het, dié wat nie ernstig siek is nie en dié wat bloot ondervoed is. Die meeste is vlugtelingkinders.
Dit is in die oë van die babas en kinders waar hul simptome die sigbaarste is. Sommige van dié ogies wil sonder enige belangstelling in die omgewing net toeval. Dis húlle wat die meeste hulp nodig het.
Volgens dr. Omar Jooma, ’n pediater van Pietermaritzburg en lid van Gift of the Givers, wat die noodlenigingspan uit Suid-Afrika na Mogadisjoe gebring het, bewys die nagenoeg 200 pasiënte wat hulle gister in die “kliniek” gesien het die land se tragiese mediese statistieke.
Nagenoeg 160 uit elke 1 000 kinders – vlugtelinge en vaste inwoners van die stad – ly aan erge wan- of ondervoeding.
“Die geringste virus of siekte takel hul gestelle so af dat hulle geen weerstand daarteen kan bied nie. Heelwat van die kinders het longontsteking of stel eenvoudig nie meer belang in kos nie. Gevolglik ontwater hulle totdat hulle in skok gaan,” het Jooma gesê.
Die gebou waar die kliniek ingerig is, dra die pokmerke van vele skietgevegte in die onlangse verlede. Nou hang sakkies vol binneaarse voeding teen die mure om minstens ’n paar kinders in so ’n mate te rehidreer dat hulle self weer kan begin drink.
Altesame 99% van die siekes is kinders.
Volgens die Verenigde Nasies se syfers het elke vrou immers gemiddeld ses kinders in ’n land waar die oorgangsregering se jaarlikse begroting maar sowat R500 miljoen beloop.
Van die kleuters van twee jaar oud weeg skaars 6 kg. Sommige se haartjies is lig van kleur, wat volgens Jooma nog ’n aanduiding van wanvoeding is.
“Van hulle is so erg ontwater dat die enigste aar waardeur ons ’n naald vir rehidrasie kan inkry dié langs die slaap is,” het dr. Anith Ramcharan, ’n pediater van Pietermaritzburg, gesê.
Volgens dr. Qasim Bhorat, ’n algemene praktisyn wat in Soweto praktiseer, mik die groep dokters daarna om soveel moontlik van die kinders wat hulle vandeesweek gaan sien, net weer ’n hupstoot te gee sodat hulle sterk genoeg kan wees om self te eet en te drink.
“ ’n Mens kan nooit toelaat dat die menigte wat hulp nodig het die klompie wat ’n mens kan help, onbelangrik laat lyk nie. ’n Mens doen wat jy kan en vir minstens ’n paar behoort ons die verskil tussen lewe en dood te beteken,” het Bhorat, die groep se mediese koördineerder, dit opgesom.
In ’n land waar 105 kinders uit 1 000 by geboorte sterf en slegs 2,4% van die samelewing ouer as 65 word, is dit van meet af ’n ellendige stryd om oorlewing.
As ’n vlugtelingkind in ’n land geteister deur hongersnood, is dit ’n nog groter opdraande stryd.
– Volg Nuus24 op Twitter.
- Beeld
