Somalië: Agent smeek president om vrylating
2012-10-05 13:20
Mogadisjoe – ‘n Franse geheime-agent wat in Somalië gyselaar gehou word het sy president, Francois Hollande, gevra om vir sy vrylating te onderhandel.
“Meneer die president, ek lewe nog, maar vir hoe lank?” het Denis Allex in ‘n video gesê wat deur die al-Shabaab rebelle-groep vrygelaat is. Allex word al langer as drie jaar as gyselaar aangehou.
“Dit alles hang van jou af. As jy nie my vrylating kan onderhandel nie, dan is dit tot my spyt dat ek moet sê dat hierdie my laaste boodskap aan jou sal wees. My lewe is in jou hande.”
Die vier minuut lange video wys ‘n vaal, maar gesonde Allex wat ‘n verklaring in Frans lees.
Allex sê in die video dat dit nou Julie is, sowat drie jaar na gewapende mans sy hotel in Mogadisjoe bestorm het en hom gevangene geneem het saam met nog ‘n Franse offisier wat intussen al ontsnap het.
“Meneer die president, ek wil graag van die oomblik gebruik maak om my oproep hulp te hernu.”
“Hierdie keer praat ek met jou in die hoop dat jy my saak anders as president Sarkozy en sy regering sal hanteer.”
Allex en sy kollega was in Mogadisjoe om raad en opleiding aan Somaliese soldate te verskaf toe die groep hom gevangene geneem het.
– Volg Nuus24 op Twitter
- AFP
