Soedanse ooreenkoms ontlont twis
2009-12-14 07:42
Kartoem. – Die twee belangrikste politieke partye in die noorde en suide van Soedan het gister ’n ooreenkoms oor demokratiese hervormings bereik.
Dit ontlont ’n twis wat gedreig het om ’n vredesooreenkoms te kelder.
Die suide se dominante Soedanse Volksbevrydingsbeweging (SVBB) het aangesluit by ’n koalisieregering van pres. Omar Hassan al-Bashir se noordelike Nasionale Kongresparty (NKP) as deel van ’n ooreenkoms in 2005 om meer as twee dekades van oorlog te beëindig.
Betrekkinge tussen die gewese vyande was tot dusver gespanne. Spanning het verlede week opgevlam toe twee senior SVBB-amptenare en talle van hul ondersteuners tydens ’n betoging hier aangekeer is.
Ontleders het gewaarsku oor die gevaar van ’n hervatting van konflik as die partye nie ooreen kan kom oor voorwaardes vir wette wat veronderstel is om die weg te baan vir verkiesings in April, en ’n referendum oor onafhanklikheid vir die suide in 2011 nie. Daar is oor beide ooreengekom in die vredesooreenkoms.
“Ons het ooreenstemming bereik oor drie baie belangrike wette, wat die oorsaak was vir ernstige verskille tussen die twee partye,” sê die SVBB se sekretaris-generaal, mnr. Pagan Amum.
Hy het gepraat ná ’n ontmoeting tussen Al-Bashir, ook hoof van die NKP, en suid-Soedan se president en SVBB-leier, mnr. Salva Kiir. Amum sê die wette hou verband met die nasionale referendum, ’n raadplegende oefening vir mense wat in grensgebiede tussen noord- en suid-Soedan woon, en ’n referendum oor of die olieproduserende gebied Abyei by die suide moet aansluit.
Nafie Ali Nafie, ’n NKP-amptenaar, het bevestig ’n ooreenkoms oor dié kwessies is by die ontmoeting bereik.
Amum sê die partye het ook ooreengekom om ’n komitee te skep om oorblywende kwessies aan te spreek.
-Reuters