Soedannese weermag teiken burgerlikes, sê menseregtegroepe
2011-08-30 14:03
New York – Die Soedannese weermag het glo dodelike lugaanvalle op burgerlikes in dié land se Nuba-gebergtes uitgevoer, het twee menseregte-organisasies Dinsdag gesê.
Dié gebergtes word tans deur rebelle beheer.
Amnestie Internasionaal en Human Rights Watch het die betrokke gebied ‘n week lank besoek. Hulle waarnemers het glo daaglikse bomaanvalle op dorpies en plaasgebiede deur regeringsvliegtuie gesien.
Altesaam 26 burgerlikes is dood en meer as 45 beseer sedert die aanvalle in Junie begin het.
'n Aanval op 14 Augustus naby die dorp Kurchu het die huis en besittings van Wazir al-Kharaba, ‘n inwoner, verwoes.
Op 19 Augustus het die waarnemers foto’s geneem van drie bomme wat van ‘n Antonov-vliegtuig naby Kurchi geval het.
Op 22 Augustus het ‘n lugaanval ‘n man se been en ‘n vrou se kakebeen ernstig beseer. ‘n Skool is ook in dié aanval beskadig.
Volgens Amnestie Internasionaal en Human Rights Watch het waarnemers altesaam 13 lugaanvalle in Kauda, Delami en Kurchi ondersoek.
– Volg Nuus24 op Twitter.
- Sapa - AFP