Soedan gaan Islamitiese grondwet aanneem
2011-10-13 17:01
Kartoem – Soedan gaan voortgaan met sy planne om ‘n volledig Islamitiese grondwet aan te neem en om Islamitiese wetgewing te versterk, het pres. Omar Hassan al-Bashir Woensdag gesê.
Bashir het in Desember gesê dat Soedan ‘n Islamitiese grondwet gaan aanneem wanneer Juba van Kartoem skei.
Sy aankondiging laat meer as ‘n miljoen Suid-Soedannese bekommerd wat nog in die noorde woon en nou wettig as buitelanders behandel word. Kartoem het dié buitelanders tot Maart 2012 gegee om die land te verlaat of om aansoek te doen daarvoor om wettig in die land aan te bly.
“Altesaam 90% van die bevolking is Moslems en die nuwe grondwet sal dit reflekteer. Die amptelike geloof sal Islam wees en die Islamitiese wet sal die hoofbron van die grondwet wees,” het Bashir in Kartoem gesê.
Suid-Soedan het onafhanklikheid verkry op 9 Julie, na ‘n referendum
onder die 2005-vredesooreenkoms wat ‘n dekades lange burgeroorlog tussen
die Moslem-noorde en die Christelike suide geëndig het.
– Volg Nuus24 op Twitter.
- Reuters