Soedan: Bashir waarsku oor Abyei-streek
2011-07-11 18:59
Londen – Omar Hassan al-Bashir, die president van Soedan, glo die omstrede Abyei-grensstreek kan tot moontlike konflik met Suid-Soedan lei indien ooreenkomste tussen die twee state nie gerespekteer word nie.
Bashir het op die BBC se Hardtalk-program gesê hy wil hê vredesmagte van die Verenigde Nasies moet Soedan verlaat. Hy het egter die Veiligheidsraad van die VN se besluit om 4 200 Ethiopiese soldate vir ses maande na Abeyi te stuur, verwelkom.
"Die Ethiopiërs het 'n mandaat om vrede in die omgewing te bewaar, so ons verwelkom Ethiopiese soldate," het hy met behulp van 'n tolk gesê.
"Albei state verwelkom hulle omdat hulle daartoe in staat is om hul werk goed te doen, anders as die soldate wat tans hier is wat daarin misluk het om die vrede te bewaar."
Kartoemse magte het op 21 Mei vanjaar internasionaal opslae gemaak toe hulle Abyei binnegeval het. Duisende inwoners moes noodgedwonge uit die streek vlug.
Suid-Soedan het Saterdag van die noorde geskei, maar die twee state moet nog besluit aan wie Abyei behoort.
"Ons sal ons magte buite Abyei herontplooi sodra die Ethiopiërs opdaag," het Bashir gesê.
Noord- en Suid-Soedan kon steeds nie oor belangrike kwessies ooreenkom nie, insluitend die grenslyn, eienaarskap van Abyei en hoe om die oliewinste, wat die lewensaar van beide ekonomieë is, te hanteer.
Op die vraag of die Abyei-geskil moontlik tot oorlog tussen die twee state kan lei, het Bashir geantwoord: "Ons het Soedan verdeel om die vrede te bewaar en wil dit graag so hou."
– Volg Nuus24 op Twitter.
- Reuters