Simon Mann vry
2009-11-03 13:04
Ekwatoriaal-Guinee se president het besluit om Simon Mann, wat veroordeel is weens sameswering om ‘n staatsgreep uit te voer, asook vier Suid-Afrikaanse huursoldate, vry te laat.
Dié land se hoofregter, Obono Olo, het aan die AP-nuusagentskap per telefoon gesê dat hulle vanoggend vrygelaat sou word.
Olo het gesê pres. Teodoro Obiang Nguema het die besluit om “humanitêre redes" geneem.
Mann was die leier van ‘n poging tot ‘n staatsgreep waarby Mark Thatcher, seun van die gewese Britse premier, Margaret Thatcher, ook ingesleep is.
Thatcher het 'n paar jaar gelede skuld in ‘n Suid-Afrikaanse hof beken op ‘n aanklag dat hy geld voorgeskiet het vir ‘n helikopter in dié staatsgreeppoging.
Thatcher is beboet en het ‘n opgeskorte vonnis ontvang.
- Sapa