Senegalese president dagvaar Franse adviseur
2011-09-20 17:55
Dakar – Die Senegalese president, Abdoulaye Wade, gaan die Afrika-adviseur in die Franse presidensie wat hom van onwettige kontanttransaksies beskuldig het ,vir laster dagvaar.
Die dagvaarding sal “vandeesweek in Parys en Dakar” ingedien word, het een van Wade se assistente gesê.
Wade se seun Karim is ook daarvan beskuldig dat hy kontantbetalings aan Franse leiers gemaak het in ruil vir hul swye oor sekere menseregteskendings in Afrika-lande. Hy sal sy eie saak teen die adviseur maak.
Robert Bourgi, ‘n lankdienende nie-amptelike skakel tussen Frankryk se Elysee-paleis en die regimes in sy voormalige kolonies, het die Franse politiek verlede maand geruk met ‘n reeks aantygings van onwettige kontanttransaksies.
Hy het daarop aangedring dat hy die onthullings gemaak het omdat hy deel van ‘n “skoon Frankryk” wil wees. Hy het erken hy het tussen 1995 en 2005 betalings ontvang waarby oudpres. Jacques Chirac en sy voormalige assistant Dominique de Villepin betrokke was.
Bourgi het Wade en sy seun daarvan beskuldig dat hulle saam met die presidente van Gabon, Burkino Faso en die Kongo groot hoeveelhede kontant aan Frankryk betaal het om hul outokratiese regimes en menseregteskendings toe te laat.
“Ek ontken hierdie ongelooflike bewerings wat niks meer as sy verbeelding is nie, ten sterkste,” het Karim Wade in ‘n verklaring gesê.
Villepin is ‘n moontlike presidentskandidaat vir Frankryk se volgende verkiesing, wat oor nege maande plaasvind.
– Volg Nuus24 op Twitter.
- AFP