Sekuriteitshoof afgedank ná sokker-chaos
2012-02-02 11:55
Kaïro – Die Egiptiese regering het die sekuriteitshoof in Port Said afgedank nadat geweld by 'n sokkerwedstryd uitgebreek en 74 mense gesterf het, het staatmedia Donderdag berig.
Mohammed Ibrahim, minister van binnelandse sake, het die sekuriteitshoof, Essam Samak, afgedank oor die betogings wat Woensdag, sekondes nadat die eindfluitjie van die wedstryd tussen Al-Masri en Al-Ahly geblaas is, plaasgevind het.
Dié geweld word as een van die dodelikste in die geskiedenis van sokker bestempel nadat honderde ondersteuners van Al-Masri op die veld gehardloop het om aanhangers van Al-Ahly aan te val.
Staatstelevisie het beeldmateriaal gewys van die polisie wat in toue staan terwyl pandemonium om hulle losgebars het.
Volgens Ibrahim is die meeste sterftes veroorsaak weens vertrapping, maar paramedici het gesê sommige mense was ook gesteek en honderde wat beserings opgedoen het.
Sewe-en-veertig mense is gearresteer, het die polisie gesê.
– Volg Nuus24 op Twitter.
- Sapa - AFP