Seerowers word langer aangehou
2011-02-07 09:34
Maleisië – Maleisiese owerhede het die aanhouding van sewe Somaliese seerowers met ses dae verleng.
Dié seerowers is verlede maand gevang tydens ‘n klopjag om ‘n gekaapte olieskip in die Golf van Aden te bevry.
“Die polisie het meer tyd nodig om die geval te ondersoek,” het ‘n woordvoerder uit die polisie se hoofkwartiere in Kuala Lumpur, hoofstad van Maleisië, gesê.
Die sewe seerowers word sedert 31 Januarie 2011 aangehou. Hulle is op die olieskip MT Bunga Laure na Maleisië gebring. Die skip is saam met sy 23-bemanningslede aan boord deur die seerowers gekaap.
Die skip was op pad na Singapoer met ‘n vrag smeerolie wat $10-miljoen (sowat R72-miljoen) werd is. Die seerowers was met AK-47’s gewapen toe hulle aan boord gegaan en beheer oor die skip geneem het.
Maleisiese vlootoffisiere van ‘n boot wat vragbote in die Golf van Aden beskerm, saam met ‘n aanvalshelikopter, het op ‘n noodoproep gereageer en na ‘n vlugtige skietgeveg die seerowers gevang.-Volg Nuus 24 op Twitter.
-SAPA