Seerowers tree waaghalsig op
2011-07-20 08:00
Theuns van der Westhuyzen
Kaapstad – Seerowery is aan die toeneem en die aanvalle raak al hoe waaghalsiger.
Net in die eerste ses maande van vanjaar is 266 aanvalle aangemeld – 70 meer as in die ooreenstemmende tydperk verlede jaar, volgens die Internasionale Kamer van Koophandel (IKK) se maritieme buro.
Somaliese seerowers het meer skepe as in die verlede aangeval, maar minder gekaap.
Hulle was in die eerste ses maande vir 163 aanvalle verantwoordelik, teenoor 100 in die eerste helfte van verlede jaar. Hulle kon net daarin slaag om 21 vaartuie te kaap teenoor 27 in dieselfde tydperk verlede jaar.
Volgens kapt. Pottengal Mukundan, die direkteur van die maritieme buro, tree die Somaliese seerowers al hoe waaghalsiger op. Hulle het byvoorbeeld in Junie vir die eerste keer in die reënseisoen en in rowwe see op skepe geskiet – iets wat hulle voorheen nie gewaag het nie.
Luidens ’n verslag wat die buro vandeesweek in Londen uitgereik het, het Somaliese seerowers op 30 Junie 20 vaartuie en 420 bemanningslede gyselaar gehou en miljoene Amerikaanse dollar aan lospryse geëis.
Baie van die aanvalle het oos en noordoos van die Golf van Aden plaasgevind.
Oor die wêreld heen is 495 seevaarders in die eerste helfte van die jaar deur seerowers gekaap en gyselaar gehou, 7 is doodgemaak en 39 is beseer.
Aan die kus van Wes-Afrika was daar ook ’n toename in gewelddadige aanvalle.
– Volg Nuus24 op Twitter.
- Volksblad