Seerowers dood twee polisiebeamptes
2011-02-08 09:32
Yaoundé - Twee paramilitêre polisiebeamptes van Kameroen is Maandag deur seerowers vermoor.
Dit kom ‘n dag nadat 11 regeringsbeamptes in die land se Bakassi-skiereiland ontvoer is, het ‘n plaaslike beampte gesê.
Cornelius Edonde, die burgemeester van Kombo Etindi, ‘n eiland binne die skiereiland, het gesê dat 11 beamptes ‘n groep van die Verenigde Nasies wat ‘n opname op Bakassi gaan doen het, vergesel het toe hulle Sondag in ‘n hinderlaag gelok is.
Die slagoffers sluit in die burgemeesters van twee ander eilande en hulle personeel, het Edonde gesê.
“Toe die boot waarop die burgemeesters van Kombo Abedimo en Idabato met nege ander mense aan boord op pad terug was, het ‘n groep onbekende, gewapende mans die boot oorval en hulle na ‘n onbekende bestemming geneem,” het hy gesê.
Maandagmiddag is twee paramilitêre polisiebeamptes wat na die ontvoerde mense gesoek het, dood in ‘n botsing in die Bakassi-skiereiland.
Edonde het gesê dat hy bang is die aanvalle word deur die Bakassie Vryheidsvegters uitgevoer.
Die groep is ‘n militante faksie wat gekant is teen die feit dat die olieryke skiereiland deur Kameroen beheer word.
-Volg Nuus24 op Twitter.
-SAPA