Saif se vingers dalk deur vegters afgesny
2011-11-21 14:53
Tripoli – Saif al-Islam, die enigste seun van Muammar Gaddafi wat nog soek was ná Gaddafi se dood, het Maandag gesê sy hand is tydens ‘n Navo-lugaanval beseer.
‘n Libiese vegter het egter gesê dat hy gesien het hoe een van sy kollegas drie van Saif se vingers afsny.
In ‘n video wat deur vegters van Zintan-stad, waar Saif aangehou word, vrygestel is, het Saif verduidelik hoe hy sy besering opgedoen het.
“Nadat ons Bani Walid verlaat het, is ons deur Navo-aanvallers getref. Altesaam 26 van ons soldate is dood. Die res is almal beseer. Ek is ook tydens die aanval beseer. Dit het sowat ‘n maand gelede naby Wadi Zamzam gebeur,” het hy gesê.
Saif is Saterdag, byna ‘n maand na Gaddafi se dood, in hegtenis geneem.
In teenstelling met wat Saif gesê het, het ‘n soldaat op ‘n program wat op Libiese televisie uitgesaai is, gesê dat hy persoonlik gesien het hoe een van sy kollegas Saif “se vingers afgesny het.”
Die kollega het dit glo gedoen omdat Saif sy vinger op ‘n dreigende wyse na hulle gewys het.
Saif (39) is Saterdag naby aan Libië se grens met Niger gevange geneem. Kort nadat hy vasgetrek is, het beeldmateriaal die vingers aan sy regterhand in verbande gewys.
– Volg Nuus24 op Twitter.
- Sapa-DPA