Saif is 'in goeie hande'
2011-11-22 10:07
Tripoli – Abdel Rahim al-Kib, die tussentydse premier van Libië, het Maandag gesê dat Libië se nuwe regering Dinsdag bekendgemaak sal word.
Hy het ook vrese besweer dat Saif al-Islam, 'n seun van Muammar Gaddafi, mishandel word.
“Ons het besluit om die regering Dinsdag aan te kondig. Ons werk hard daaraan om te verseker dat ons 'n standvastige, samehangende en bevoegde regering kry,” het hy tydens ‘n mediakonferensie gesê.
Kib het gesê dat hy Maandag ‘n vergadering met die Nasionale Oorgangsraad (NOR) gehad het om die nuwe regering te bespreek.
Abdel Hafiz Ghoga, die NOR se adjunk-voorsitter, het Sondag gesê die aankondiging van die nuwe regering, wat oorspronklik daardie dag gemaak sou word, is met 48 uur uitgestel.
Hy het nie ‘n rede vir die vertraging gegee nie, maar dit blyk die inhegtenisname van Saif al-Islam, een van Muammar Gaddafi se seuns, te wees.
“Ons wil almal verseker dat Saif in goeie hande is. Hy word goed behandel, 'n honderd maal beter as wat hy en sy pa ooit die Libiese bevolking behandel het,” het Kib gesê.
– Volg Nuus24 op Twitter.
- Sapa - AFP