SAners ly oor ‘humanitêre krisis’ in Soedan
2011-06-23 08:05
Pretoria - Verskeie Suid-Afrikaners bevind hulle midde-in wat hulle beskryf as ’n menslike tragedie wat hom in die grensgebied tussen die Soedan en Suid-Soedan afspeel.
Etlike gemeenskappe soos Kadugli aan die noordekant van die grens in die Suid-Kordofan-provinsie is reeds die afgelope twee weke omtrent geheel en al van die buitewêreld afgesny.
Soldate van die Soedanse weermag beset die lughawe en dreig om vliegtuie van die Verenigde Nasies (VN) af te skiet as hulle sou durf voorrade inbring.
Aan die ander kant van die grens is die situasie ewe benard en vertel een Suid-Afrikaner hulle is afhanklik van vars kosvoorraad van Khartoem, waarvan die lewering nou al weke lank onderbreek word.
Dié gebied val in die bestrede Abyei-grensstrook, waar die meeste olievelde ook is.
By Kadugli grens die VN-missie in die Soedan (UNMIS) aan ’n vlugtelingkamp waar hoofsaaklik vroue en kinders skuil.
Duisende inwoners is reeds dood in die geweld wat sedert die begin van Junie weer losgebars het.
Baie mense het in die Nuba-berge gaan skuil, sê die raad vir buitelandse aangeleenthede (www.cfr.org), ’n internasionale dinkskrum oor wêreldkwessies.
Dié raad meen ’n konflik soortgelyk aan dié in Darfoer dreig om op die grens te ontstaan – dít terwyl Suid-Soedan op 9Julie sy onafhanklikheid vier en die VN se mandaat in die Soedan op dié datum tot ’n einde kom.
Die hernieude geweld het losgebars toe die Soedan beweer het Suid-Soedanse skerpskutters het sowat drie weke gelede eerste op sy inwoners losgebrand.
Die Soedan het ’n brigade soldate in die Abyei-gebied ontplooi, sowel as vegvliegtuie.
“Suid-Kordofan is ’n oorlogsone. Die Soedanse weermag bombardeer elke dag die gebied met Antonov- en MiG-vliegtuie. Dié se soldate het ook beheer oor die lughawe, terwyl omtrent elke pad in die gebied met myne beplant is,” vertel een Suid-Afrikaner. Nie een van die Suid-Afrikaners wil geïdentifiseer word nie weens die aard van hul werk.
Die VN het vir verskeie van sy agentskappe daar groot hoeveelhede voorraad uitgeplaas in die lig van die huidige gebrek aan vlugte. Enkele helikoptervlugte gaan wel nog voort.
Die VN se kantoor vir die koördinering van humanitêre aangeleenthede (OCHA) het vandeesweek versoek dat ’n humanitêre korridor dringend geskep moet word om voorraad van noord na suid in die Abyei-gebied te vervoer.
“Die Soedanse weermag skiet op voorraad-trokke op die grens. Daar is groot tekorte aan drinkwater en kos op ons dorp (net suid van die grens). Ons drink reeds reënwater en die plaaslike mense het niks om van te lewe nie,” vertel een Suid-Afrikaner.
Aan die ander kant van die grens sê nog ’n Suid-Afrikaner, wat vir ’n VN-agentskap werk, dat hulle in hul kamp bly aangesien mense letterlik voor die hekke van hul kamp deur Soedanse soldate doodgeskiet is.
Die regerings van die Soedan en Suid-Soedan het weliswaar vandeesweek ’n ooreenkoms onderteken ingevolge waarvan hulle onderneem om hul soldate aan die grensgebied te onttrek. ’n Neutrale vredesmag van Ethiopië sal vervolgens daar ontplooi word.
Volg Nuus24 op Twitter
- Beeld