SAR sal Ugandese rebelleleier help vang
2010-08-18 21:26
Kampala - Die Sentraal-Afrika Republiek (SAR) het Woensdag beloof om Joseph Kony, die hoof van die berugte Ugandese rebellebeweging die Lord’s Resistance Army (LRA), met die hulp van Uganda, die VSA en Frankryk, in hegtenis te neem.
“Die samewerking van dié vier regerings sal dit moontlik maak om Kony in hegtenis te neem,” het Jean-Francis Bozize, minister van verdediging en die oudste seun van pres. Francois Bozize gesê.
Volgens Bozize het die regering onlangs troepe in die noordooste van die land aangestel.
In 2009 het die SAR die Ugandese weermag toegelaat om sy grense binne te tree nadat die LRA die oostelike dele van die land begin teister het.
Die LRA, wat deur Kony gelei word, het in 1988 hul beweging teen die Ugandese regering begin en het sedertdien duisende mense ontwortel. Die groep is bekend daarvoor dat hul kinders, sommige so jonk as nege jaar, as seksslawe en soldate gebruik.
Sedert 1995 het die rebellegroep naburige lande ook ingevaar.
Volg Nuus24 op Twitter.
- SAPA