SAR herkies president
2011-02-02 15:00
Bangui - Francois Bozize is herkies as die president van die Sentraal-Afrikaanse Republiek (SAR), volgens uitslae wat deur dié land se verkiesingskommissie bekend gemaak is.
Die uitslag, wat daarop dui dat Bozize 66.08% van die stemme ingepalm het, is egter reeds deur drie van die vyf kandidate verwerp.
Die voormalige premier, Martin Ziguele, die vorige minister van verdediging, Jean-Jacques Demafouth en Emile Gros-Raymond Nakombo, die opposisieleier, het die verkiesing as ‘n klug beskryf.
Ziguele, Demafouth en Nakombo het vir sekere voorwaardes gevra voor die stemme begin tel word en het later gesê hulle is nie ingelig dat die telprosedure begin is nie.
Bozize se sterkste opponent was Ange-Felix Patasse, die president by wie hy in 2003 oorgeneem het.
Patasse het 20.10% van die stemme ingepalm.
“Dit was ‘n demokratiese oorwinning vir iemand wat met ‘n staatsgreep oorgeneem het en wettiglik deur ‘n verkiesing in 2005 heraangestel is,” het Fidele Ngouandjika, regeringswoordvoerder, gesê.
Volg Nuus24 op Twitter.
- SAPA