SAOG-leiers lees Mugabe leviete voor oor verkiesing
2011-06-12 09:04
Pres. Robert Mugabe het gisteraand gehoor in watter omstandighede ’n verkiesing in Zimbabwe gehou mag word.
In ’n buitengewone sitting van staatshoofde van die Suider-Afrikaanse Ontwikkelingsgemeenskap (SAOG) in Johannesburg is die “verwysingsraamwerk en voorwaardes” vir die hou van ’n vreedsame verkiesing aan sowel Mugabe as sy opponent en eerste minister, Morgan Tsvangirai, voorgehou.
In wat gister deur amptenare beskryf is as ’n “ontwerp-padkaart” na ’n grondwetlike refe- rendum en dan parlementêre en presidentsverkiesings, is die datums daarvoor egter nie vasgestel nie.
“Dis vir die Zimbabwiërs self om te besluit,” is aan Rapport gesê.
Na verneem word, is Mugabe nou meer daarvoor te vinde dat verkiesings eers vroeg volgende jaar plaasvind, mits die referendum oor ’n nuwe grondwet nog vanjaar gehou word.
Ingevolge die “padkaart,” waarin Rapport gedeeltelike insae gegee is, moet die partye in die huidige regering van nasionale eenheid aan vier voorvereistes voldoen:
* “’n Onmiddellike einde moet gemaak word aan die huidige geweld, intimidasie, haat-spraak, teistering en enige ander optredes wat die bestaande skikkingsooreenkoms in die gedrang bring.
* “Die vestiging van omstandighede waarin vrede, veiligheid en vrye politieke aktiwiteit moontlik is.
* “Die referendum en die verkiesing moet gereël word en plaasvind ingevolge die beginsels en riglyne vir die hou van demokratiese verkiesings.
* “SAOG-waarnemers moet toegelaat word om die aanloop tot die stemmery te monitor.”
Die spitsberaad gisteraand het plaasgevind nadat Mugabe Vrydagaand ’n ure lange “welwillendheidsbesoek” aan pres. Jacob Zuma, die SAOG-fasiliteerder, gebring het.
Dié besoek kom nadat verhoudinge tussen hulle in Maart vanjaar versleg het tydens ’n SAOG-beraad in Zambië.
By dié geleentheid het die SAOG onder Zuma se voorsitterskap veral die Zimbabwiese veiligheidsdienste, wat regstreeks onder Mugabe se beheer staan, veroordeel vir die “polarisering van die politieke omgewing deur die toename in geweld, arrestasies en intimidasie in Zimbabwe”.
Mugabe het sedertdien verskeie vrugtelose pogings aangewend om sy verhouding met Zuma en veral die Suid-Afrikaanse onderhandelingspan in Zimbabwe te herstel.
- Volg Nuus24 op Twitter.
- Rapport