SA-fotograaf in Libië gyselaar geneem
2011-04-07 23:00
Johannesburg - Anton Hammerl, ‘n Suid-Afrikaanse fotograaf wat by The Star gewerk het, is in Libië gyselaar geneem deur Muammar Gaddafi se magte, het die GlobalPost-nuuswebwerf Donderdag berig.
Hammerl is saam met drie ander buitelandse joernaliste gyselaar geneem toe hulle in die buitewyke van Brega gewerk het.
Peter Bouckaert, die direkteur van noodgevalle by die menseregte-organisasie Human Rights Watch, het Donderdagoggend gesê die joernaliste is Dinsdagaand ontvoer.
Bouckaert het sy inligting gekry deur ‘n e-pos van die New York Times-verslaggewer CJ Chivers, wat op die toneel was.
“Ooggetuies het gesê die bussie waarin onder meer die joernalis James Foley gereis het, is voorgekeer. Gaddafi se magte het die joernaliste gyselaar geneem en die bussie se bestuurder vrygelaat.
“Saam met Foley het die magte vermoedelik ook vir Clare Morgana Gillis, ‘n Amerikaanse vryskut-verslaggewer, ‘n Spaanse fotograaf en Anton Hammerl, ‘n Suid-Afrikaanse fotograaf, gyselaar geneem.
“Dit is onbekend waar hulle hulself op die oomblik bevind.
“’n Versoek is aan die Libiese kantoor vir buitelandse media gerig om die joernaliste vry te laat. Ons doen ‘n beroep op die Libiese owerhede om die joernaliste onmiddellik en ongedeerd vry te laat.”
Die organisasie Verslaggewers Sonder Grense het gesê hy het by ‘n “betroubare bron” geleer dat vier joernaliste – ‘n Suid-Afrikaner, twee Amerikaners en ‘n Spanjaard – sedert 4 April vermis word.
Drie joernaliste van Al-Jazeera wat in Maart in hegtenis geneem is, word steeds deur Gaddafi se magte aangehou.
- Volg Nuus24 op Twitter
- SAPA