SA boere vat pad na Kongo
2011-11-28 16:06
Windhoek – 'n Groep Suid-Afrikaanse boere is met ‘n trek plaasimplemente en huishoudelike ware na die Republiek van die Kongo onderweg om kommersieel daar te gaan boer, het die Republikein berig.
Die reisgeselskap bestaan in totaal uit 16 mense.
“Hierdie is die eerste groep wat vertrek. Altesaam 40 gesinne sal as deel van die projek na die Kongo verhuis om daar te gaan boer. Nie almal sal permanent gaan nie; die wat net deeltyds gaan, sal tussen Suid-Afrika en die Kongo pendel,” het Wynand du Toit, leier van die groep, Saterdag op ’n kleinhoewe by Brakwater, gesê.
Die konvooi bestaan uit sowat vier vragmotors en vyf viertrekbakkies met sleepwaens en karavane wat na Oshikango vertrek het.
Du Toit het ’n huishoudelike naam in Suid-Afrikaanse militêre geskiedenis geword toe hy in 1985 tydens ’n sending in Angola gevange geneem en vir 837 dae aangehou is.
Hy en sy groep sal na verwagting Maandag die grens na Angola vanuit Namibië oorsteek, wat ook afstandgewys die middelpunt van hul reis van 5 500 km sal wees.
Hierna sal hulle vir tien dae deur Angola reis voordat hulle drie dae deur die Demokratiese Republiek van Kongo se suidpunt sal trek en daarna vir twee dae deur die Republiek van Kabinda sal reis voordat hulle in die Kongo aankom.
– Lees die volledige artikel op die Republikein.
– Volg Nuus24 op Twitter.