SA ambassade in Mosambiek gesluit
2010-09-02 05:19
Johannesburg - Die Suid-Afrikaanse regering het sy ambassade in Mosambiek gesluit ná gewelddadige betogings oor stygende pryse in die hoofstad Maputo, het die SABC Woensdag berig.
Die pad na Suid-Afrika is ook gesluit ná betogers die roete afgesper en 'n vulstasie in Matola tussen Maputo en die grenspos aan die brand gesteek het.
"Suid-Afrikaners wat na Mosambiek reis moet hul lugdienste of ambassade kontak om uit te vind oor die situasie in die land," het Saul Molobi, woordvoerder van internasionale betrekkinge, gesê.
Baie Suid-Afrikaners kan glo ook nie by die lughawe uitkom nie.
Die polisie in Mosambiek het vier mense doodgeskiet en 27 gewond toe hulle op betogers losgebrand het.
- SAPA