SA, Zim teken beleggingsooreenkoms
2009-07-22 12:40
Johannesburg – ‘n Bilaterale beleggingsooreenkoms tussen Suid-Afrika en Zimbabwe sal eersdaags onderteken wees.
Welshman Ncube, die Zimbabwiese minister van handel en nywerheid, en sy Suid-Afrikaanse eweknie, Rob Davies, is besig om oor die ooreenkoms te onderhandel, het Zimbabwe se minister van finansies, Tendai Biti, gesê.
Die bilaterale ooreenkoms handel oor die beskerming van beleggings in Zimbabwe.
Volgens Biti sal samesprekings rondom die ooreenkoms binne die volgende paar weke afgehandel wees.
Biti het gesê Suid-Afrikaners wat in Zimbabwe wil belê, het aangedring op die ooreenkoms.
Die ondertekening van die beleggingsooreenkoms is in Maart uitgestel, skynbaar nadat Harare protes aangeteken het oor ‘n klousule in die kontrak aangaande grond en beleggings in grond.
- SAPA