SA, Aus wil Zim help
2010-01-26 17:20
Pretoria – Suid-Afrika en Australië het ooreengekom op projekte om Zimbabwe te help herbou, het Stephen Smith, buitelandse minister van Australië, Dinsdag in Pretoria gesê.
“Ons het ooreengekom op projekte om Zimbabwe te help met belastingwette, en ook tegniese vaardighede wanneer dit by water- en sanitasie-stelsels kom," het hy aan 'n nuuskonferensie gesê.
Hy het gesê Zimbabwe het dié tegniese vaardighede nodig om sy belastingwette te verander en die land se ekonomie te herbou.
Smith het gesê Australië sal graag wil sien dat Zimbabwe se president Robert Mugabe nie meer dié amp beklee nie, en dat politieke gebeure in die land bemoedigend is.
"Die Suid-Afrikaanse regering se pogings om vordering in Zimbabwe te bewerkstellig, het die Australiese regering aangemoedig om as vennoot op te tree," het Smith bygevoeg.
Smith het die kommentaar gelewer na afloop van 'n vergadering met sy Suid-Afrikaanse eweknie, Maite Nkoana-Mashabane, om die verhouding tussen die twee lande te verbeter.
– Sapa