S-Soendan: nuwe valuta is 'ekonomiese oorlog'
2011-07-26 19:53
Juba – ‘n Suid-Soedannese beampte het Noord-Soedan daarvan beskuldig dat hulle ‘n “ekonomiese oorlog” begin het deur ‘n nuwe valuta aan te neem.
Die besluit kan die sukkelende nuwe regering van Suid-Soedan met tasse vol nuttelose valuta laat, het die beampte gesê.
Die noorde se regering in Kartoem het Sondag sy nuwe geldeenheid bekend gemaak. Suid-Soedan het sowat ‘n week gelede eers begin om sy nuwe geldeenheid te gebruik nadat die land op 9 Julie onafhanklikheid gekry het. Beide die ou en die nuwe valuta word Ponde genoem.
Pagan Amum, die sekretaris-generaal van die suidelike regering, het gesê dat die noordelike regering ‘n ooreenkoms verbreek het. Die noorde het ooreengekom om nie ‘n nuwe valuta aan te neem vir die eerste ses maande nadat die suide dit gedoen het nie.
Hy het gesê die verwikkeling sal die suidelike regering ten minste $700 miljoen (sowat R4.6 miljard) kos. Dit is ‘n verdere uitdaging vir die onderontwikkelde land, wat begin om aan basiese behoeftes van sy meer as 8 miljoen burgers te voorsien.
Suid-Soedan is ryk in olie, maar is een van die wêreld se armste en swakste ontwikkelde lande.
– Volg Nuus24 op Twitter.
- Sapa - AP