Rwanda: Verkiesing reeds uitgemaakte saak
2010-08-10 11:00
Kigali - Die uitslae van die Rwandese presidentsverkiesing is nog nie finaal bekend gemaak nie, maar dit is reeds 'n uitgemaakte saak wie dié verkiesing gewen het.
Alles dui daarop dat pres. Paul Kagame op ’n oorweldigende meerderheid afstuur.
Kagame het 95% van die stemme in die 2003-verkiesings gekry het.
Volgens die voorafgaande uitslae wat deur die Nasionale Verkiesingskommissie bekend gemaak is, loop Kagame met sowat 1,6 miljoen stemme voor.
Dié stemme kom uit net elf van die dertig distrikte wie se stembusse reeds getel is.
Nadat dié uitslae bekend gemaak is het Kagame by sy ondersteuners aangesluit om dié oorwinning te begin vier.
Dié feesvieringe het by die Amaharo-stadion in Kigali begin.
Die finale uitslag word vandag of more verwag.
- Sapa
Volg Nuus24 op Twitter.