Rugby help jonges om Libiese stryd te vergeet
2011-11-01 08:03
Benghazi – Die era ná die dood van kol. Muammar Gaddafi sal na verwagting meebring dat Libië se klein groepie rugbyspelers hul geliefde sport met nuwe vryheid kan beoefen.
Die afgelope naweek het die eerste klompie jong manne – sommige pas terug van die front waar hulle die laaste paar maande teen Gaddafi se vegters oorlog gemaak het – aangetree om te begin oefen.
Benghazi, tradisioneel die hoofstad van die opposisie in die land, was ook jare lank die hoofstad van die enkele rugbyklubs.
Die Gaddafi-regime het egter van sokker gehou en rugby het aan die agterspeen gesuig.
Vroeër vanjaar het een van die opposisiemagte se spesmagte skaam-skaam ’n groepie Suid-Afrikaanse joernaliste by ’n hospitaal in Adjabia genader kort nadat die burgeroorlog in die land uitgebreek het. In gebroke Engels het hy die groepie laat verstaan dat hy ’n groot bewonderaar van die Springbokke is en self ook rugby speel.
Swaar gewapen en in die swart uniform van die spesmagte het hy allermins soos ’n rugbyspeler gelyk, maar hy het vertel dat klubrugby in die ooste van die land springlewendig is.
Hy het agtsteman vir sy klub in Benghazi gespeel en gedink Victor Matfield en Bakkies Botha is ongelooflike spelers.
Die spanne het egter maar noustrop getrek, want die regering het die meeste van die geld vir sport vir die bevordering van sokker gegee.
Die soldaat het ’n Springbok-ondersteunersmussie en ’n Suid-Afrikaanse lapelwapen van die groep gekry.
Rugby gaan egter nou meer as net ’n sport wees, het Thair el-Heri, wat Benghazi se rugbyklubs vyf jaar gelede tot stand gebring het, die naweek gesê.
Dit moet nou die jeugvegters van die oorlog laat vergeet en hulle help met die verwerking van die trauma van makkers wat gesterf het.
El-Heri meen dis juis die dissipline en onverskrokkenheid wat sy rugbyspelers deur die beoefening van hul spel opgebou het wat van hulle goeie soldate gemaak het. “Die Libiërs is van nature goeie vegters en ons het dit pas bewys. Nou sal ons dié eienskap terugkanaliseer in rugby. Die jeug het nou sport nodig om hulle weer rigting te gee.”
In die bouvallige stadion in Benghazi het El-Heri sy spelers begin dril. Nuuskierige jong mense het gaan kyk en later begin saamspeel.
– Volg Nuus24 op Twitter.
- Beeld