Rooi Kruis, WGO staan nou slagoffers by
2011-05-21 09:44
Kaapstad - Minstens 17 000 mense woon steeds in tentedorpe in die noorde van Namibië sedert vanjaar se vloede mense se lewe in dié streek erg ontwrig het.
Die ergste skade is reeds in Maart aangerig, maar ’n lang, swaar reënseisoen het veroorsaak dat die gebiede wat die ergste geraak is, moeilik bereikbaar was.
Die Namibiese Rooi Kruis was Vrydag huiwerig om ’n amptelike raming te gee van die aantal mense wat deur vloede geraak is, maar het gesê tot 130 000 mense kan straks langtermyn-bystand nodig hê.
Dorkas Kapembe-Haiduwa, sekretaris-generaal van dié organisasie, het gesê hulle behoort binne die volgende week meer akkurate besonderhede te hê.
“Die organisasie het nou ’n amptelike mandaat om die regering by te staan met die bestuur van tentedorpe.
“Ons eerste prioriteit is om die verskillende gebiede te besoek en met ’n registrasieproses in die kampe te begin,” het sy gesê.
“Ons wil ook seker maak die nodige gemeenskapstrukture funksioneer binne die kampe, sodat mense se lewe sover moontlik kan voortgaan soos dit was voor die vloede.”
Benewens hierdie planne, het die Rooi Kruis kragte saamgesnoer met die Wêreldgesondheidsorganisasie (WGO) om te verseker siektes versprei nie binne die kampe nie.
“Ons het nog nie ’n krisis nie, maar werk nou daaraan om enige moontlike probleme te voorkom.”
Dr. Magda Robalo, die WGO se verteenwoordiger in Namibië, het in ’n verklaring gesê sowat 10% van gesondheidsdienste is heeltemal onbereikbaar omdat paaie onder water is.
“Hoewel die watervlakke daal, verteenwoordig stilstaande water, onvoldoende sanitasiedienste en ’n gebrek aan toegang tot veilige drinkwater steeds risiko’s wat die verspreiding van siektes betref,” het sy gesê.
“Daar is steeds toenemend ’n behoefte vir die gebruik van insekdoder, muskietnette en voeding vir kinders onder vyf jaar oud, swanger vroue, bejaardes en ander mense wie se immuunstelsel verswak is.”
Volg Nuus24 op Twitter.
- Die Burger