Robbekongres: Nuutste data ingewag
2011-09-23 17:30
Windhoek – Die Namibiese Ombudsman, adv. John Walters, gaan wag vir die bevindinge van die Benguelakomitee alvorens hy sy voorstelle en kommentaar oor die jaarlikse robbe-oes aan die departement van visserye en mariene hulpbronne oorhandig en in die openbaar bekendmaak, het die Republikein berig.
Walters het na afloop van Dinsdag se robbekongres in Windhoek gesê die komitee se driejaarlikse opname oor die stand van die Namibiese robbevolking word in Desember vanjaar weer uitgevoer.
Die komitee bestaan uit kundiges van Namibië, Suid-Afrika en Angola.
“Ek gaan vir hierdie opname wag omdat dit die nuutste inligting sal verskaf oor die huidige stand van die robbevolking langs die Namibiese kus en of die robbe deur die jaarlikse oes uitgeroei word al dan nie.”
Walters het die week se robbekongres intussen as ’n sukses bestempel.
“Ek is bly ek het dit gedoen. Elke beswaarde het die kans gekry om sy standpunt te stel en elkeen het geskrewe stukke ingehandig wat ek deeglik gaan bestudeer. Ek sou dit as interessante voorleggings beskryf.”
– Lees die volledige artikel by die Republikein.
– Volg Nuus24 op Twitter.