Reksprong loop skeef vir Aussie
2012-01-09 07:00
Harare – ’n Australiese vrou het ’n reksprong in Zimbabwe oorleef toe die koord gebreek en sy in die Zambesi-rivier geval het.
Erin Laung Worth (22) het die reksprong op Oujaarsdag van die Victoria-watervalbrug gedoen.
Die brug staan 110 m bo die rivier, op die grens van Zimbabwe en Zambië.
In beeldmateriaal van haar sprong kan gesien word hoe die koord ongeveer 25 m bo die watervlak breek en Worth in die water val.
“Dit het swart geword,” het Worth aan Australië se Channel 9 News gesê. “Toe ek bykom, het dit gevoel of ek oral op my lyf geslaan is.”
Die temperatuur van die yskoue rivierwater het gehelp om haar by te bring.
Sy is stroom af na versnellings in die rivier gesleur.
’n Stuk van die koord wat aan haar voete vas was, het aan rotse onder die water vasgehaak en haar onder die water ingetrek.
“Ek moes self onder die water swem en die koord gaan losmaak,” het Worth vertel.
Sy kon dit regkry om na rotse naby die oewer te swem, waarna mense haar uit die water gehelp het.
Sy is aanvanklik op haar rug laat lê en kon weens die baie water wat sy reeds gesluk het nie asemhaal nie.
“Hulle het my toe op my sy gedraai, waarna ek water en bloed gehoes het.”
Komm. Brenda Muntemba van die polisie in Zambië het aan die Post Zambia gesê Worth is by die Victoria Falls-kliniek in Zimbabwe behandel voordat sy na Suid-Afrika geneem is.
Sy was ’n week in die hospitaal.
Hoewel sy kneusplekke oor haar hele lyf opgedoen het, het Worth geen ernstige beserings opgedoen nie.
“Dit is ’n wonderwerk dat ek oorleef het,” het sy verklaar.
– Volg Nuus24 op Twitter
- Beeld