Rebelleleier lewend oorhandig, sê weermag
2009-08-05 22:20
Kano – Die Nigeriese weermag het Woensdag daarop aangedring dat hulle die rebelleleier Mohammed Yusuf lewend aan die polisie oorhandig het.
Yusuf, gewese leier van Boko Haram (ook bekend as Nigerië se Taliban), is onder verdagte omstandighede dood ná hy verlede Donderdag in hegtenis geneem is.
“Ek het hom persoonlik gevang en aan die polisie oorhandig,” het kol. Ben Ahonotu van die weermag gesê. “Ek is egter kort daarna laat weet Yusuf is in ‘n skietery dood.”
Mohammed Yusuf is gevang toe troepe op militante Islamiete, wat in ‘n moskee in Nigerië vergader het, toegesak het.
‘n Senior polisiebeampte het vroeër gesê Yusuf is Donderdag doodgeskiet toe hy probeer ontsnap het.