Rebelle, weermag bots in Tripoli
2011-12-11 22:07
Tripoli – 'n Sekerheidswag is dood nadat revolusionêre magte naby Tripoli se lughawe met die nasionale weermag gebots het, het amptenare Sondag gesê.
Sers. Abdel-Razik el-Shibahy, woordvoerder, het gesê vegters van die westelike bergdorpie Zintan, wat Tripoli se internasionale lughawe beheer, het Saterdag twee keer op die konvooi van genl. Khalifa Hifter, bevelvoerder van die nasionale weermag, losgebrand.
El-Shibahy het die magte van Zintan daarvan beskuldig dat hulle gepoog het om 'n sluipmoord op Hifter uit te voer. Een sekerheidswag is dood en vier ander gewond in die tweede aanval.
"Zintan-rebelle het van links, regs en voor op die konvooi geskiet," het hy gesê. "Hulle dink die weermag wil die lughawe oorneem maar dis nie so nie."
Khaled el-Zintani, 'n woordvoerder vir die Zintan-rebelle, het ontken dat hulle Hifter wou vermoor, en het gesê hulle het bloot op die konvooi geskiet omdat hulle nie in kennis gestel is dat die generaal op pad was nie.
– Volg Nuus24 op Twitter.
- Sapa - AP