Darfoer: Rebelle hoop op politieke oplossing
2011-12-28 21:04
Darfoer – 'n Nuwe rebelle-alliansie wat 'n stryd voer teen Soedan se president Omar al-Bashir wil 'n politieke oplossing vir die voortslepende konflik in die land vind, maar glo nie die regering stel daarin belang om te onderhandel nie, het een van die rebelleleiers aan die nuusagentskap AFP gesê.
"Die konflik word verdiep deur die regering van die Nasionale Kongresparty, dié mense beskerm hulleself," het Minni Minnawi, die hoof van 'n faksie in die Soedan-bevrydingsmag (SLA) in Darfoer, gesê.
Minnawi het met AFP gepraat kort voor die dit aan die lig gekom het dat Khalil Ibrahim, hoof van die geregtigheid-en-gelykheidsbeweging, die grootste gewapende mag in Darfoer, gedood is in 'n aanval deur regeringsmagte.
Die impak van Ibrahim se dood op die alliansie is nie duidelik nie. Die totstandkoming van dié alliansie van rebellegroepe in November bekommer die internasionale gemeenskap egter, en Ban Ki-moon, sekretaris-generaal van die VN, het die alliansie onlangs veroordeel.
Die alliansie het dit duidelik gemaak dat sy doel is om Bashir uit die kussings te lig.
"Hierdie alliansie se prioriteit is om 'n politieke oplossing voor te stel – hoe om die identiteit van Soedan te herdefinieer om die diversiteit van sy mense te weerspieël en hoe om die land te bevry van die wense van een groep mense en een godsdiens," het Minnawi gesê.
Die alliansie beywer hom onder andere vir 'n nuwe grondwet wat "magsdeling en die verantwoordelike deel van welvaart" tot gevolg sal hê.
– Volg Nuus24 op Twitter.
- Sapa - AFP