Rebelle ontsnap uit Nigeriese tronk
2011-08-08 12:43
Port Harcourt – Vyf lede van ‘n militante groep het Sondag uit die tronk in Port Harcourt, Nigerië ontsnap deur hul metaalbeddens te gebruik om oor 'n muur te klim, het ‘n woordvoerder van die gevangenis gesê.
Die rebelle, wat deel is van ‘n groep wat veg vir ‘n groter deel van die land se olierykdom, is verantwoordelik vir sabotasie-aanvalle en ontvoerings van oliewerkers in die Niger-delta.
‘n Amnestie in 2009 het ‘n einde gebring aan grootskaalse pyplyn-aanvalle, maar oliediefstal en ontvoerings vind steeds plaas.
“Sewe gevangenes het ontsnap waarvan twee weer in hegtenis geneem is. Die vyf wat weggekom het is gevaarlike misdadigers,” het ‘n woordvoerder van die Port Harcourt-gevangenis gesê.
Hy het gesê dat ‘n verdere 23 gevangenes ook probeer het om uit die tronk te ontsnap maar dat hulle pogings onsuksesvol was.
– Volg Nuus24 op Twitter.
- Reuters