Rebelle moor honderde
2010-03-29 02:11
Kinshasa – Uganda se rebellegroep, Lord's Resistance Army (LRA), het sowat 290 mense in die Demokratiese Republiek van die Kongo (DRK) tydens ‘n aanval in Desember 2009, wat nooit aangemeld is nie, vermoor.
Volgens amptenare van die Verenigde Nasies (VN) het dié aanval in Desember verlede jaar in die noordooste van die DRK plaasgevind. Sowat 290 of selfs meer mense is vermoor.
“Die mans is om die bors vasgemaak en dan met ‘n hou aan die agterkant van hul koppe of nekke doodgeslaan. Dit was vinnig en grusaam,” het ‘n VN woordvoerder gesê.
Die rebelle het glo ook pangas gebruik.
Hierdie aanval, waarvan die VN vir maande lank nie bewus was nie, het debatte oor die VN se teenwoordigheid in die DRK laat opvlam. Baie kla dat hulle nie die nodige bronne het om burgerlikes te beskerm nie.
Daar is ook druk op die VN van die regering se kant om uit die DRK te onttrek.
- Reuters