Rebelle maak vordering in Sirte
2011-10-09 21:16
Sirte – Libië se revolusionêre magte het Sondag ‘n konferensiesentrum binnegeval wat vroeër ‘n sleutelbasis vir vegters lojaal aan Muammar Gaddafi was.
Die oorname van die konferensiesentrum in Sirte, die voortvlugtige Gaddafi se tuisdorp, was nog ‘n stap vorentoe in die rebelle se poging om hul oorblywende teenstand mettertyd te versmoor in die dorp.
Die onvermoë om Sirte oor te neem, meer as ses weke nadat die rebellemagte Tripoli binnegeval het, het ‘n struikelblok vir die nuwe regering, wat ‘n tydlyn vir verkiesings wil opstel, geword.
Gaddafi-ondersteuners is ook nog in beheer van Bani Walid, waar die rebellemagte hulle teen moeilike terrein vasgeloop het.
Sirte lê sowat 400 kilometer suidoos van Tripoli. Die oorname daarvan is belangrik vir die eenheid van die land se sowat ses miljoen mense, aangesien dit min of meer in die middel van die mees dig bevolkte gebied in Libië lê en die maklikste paaie tussen oos en wes daar verbyloop.
Nadat hulle drie weke lank aan die buitewyke van die stad geveg het, het die rebelle Vrydag ‘n grootskaalse aanslag van stapel gestuur. Die lojaliste het egter teruggeveg.
Die Ouagadougou-konferensiesentrum was teen Sondag in puin. Dié spog-kompleks is vroeër tydens die botsings deur die lojaliste as basis gebruik.
- Volg Nuus24 op Twitter
- Sapa - AP