Rebelle beheer strategiese punte in Tripoli
2011-08-22 08:07
Tripoli – Rebelle in Libië het beheer oorgeneem van die mees strategiese plekke in Tripoli, buiten die Libiese leier, Muammar Gaddafi, se vesting in die stad, het RSG Maandag berig.
Dit volg na hewige gevegte Sondag in en om die stad plaasgevind het.
Gaddafi het vroeër op staatstelevisie gesê hy sal tot aan die einde bly, maar dit is egter onduidelik of hy hom steeds in Tripoli bevind.
Die rebelle se Nasionale Oorgangsraad het gesê Gaddafi se oudste seun, Muhamed Gaddafi, is nie beseer in 'n oor-en-weer skietery tussen sy wagte en rebelle, toe hulle op sy huis in Tripoli toegeslaan het nie.
Volgens die rebelle het hulle Seif al-Islam, nog 'n seun van Gaddafi, ook aangekeer.
Skerpskutters het Sondag tydens betogings teen die regering in Tripoli weer op inwoners geskiet.
Die Suid-Afrikaanse regering wou nie bevestig of die personeel by die ambassade in Tripoli uit die stad verwyder is nie.
Intussen het 'n skip wat deur die Internasionale Organisasie vir Migrasie gestuur is, vanuit Benghazi na Tripoli vertrek om honderde buitelanders te verwyder.
“Die meeste van die buitelanders is van Egipte, Bangladesj en die Fillipyne. Hulle sal teruggeneem word na Benghazi en vandaar na Egipte,” het Martin Jerret, 'n woordvoerder van die IOM, gesê.
Vroeër is daar op 'n skip van Malta, wat ook buitelanders moes verwyder, geskiet en die skip was genoodsaak om terug te draai.
– Volg Nuus24 op Twitter.
– RSG