Pta-mans in arres in Botswana oor jag
2011-12-14 09:30
Pretoria – Drie Suid-Afrikaners is Dinsdag by die Platjan-grenspos in Botswana gearresteer nadat hulle na bewering onwettig in dié land gejag het.
Die mans is al drie van Pretoria.
Hulle is glo in die besit van trofeë gevind wat horings en sebravelle insluit. Hulle het ook vleis en biltong by hulle gehad.
Die Bainesdrift-polisie in Botswana het Dinsdagaand bevestig dat drie Suid-Afrikaners gearresteer is, maar wou nie verdere inligting bekend maak nie.
Johan Jacobs, ’n mede-eienaar van die Farm Mopani-wildplaas in Botswana, het gesê die mans is bekend aan hom en het “al geruime tyd probleme veroorsaak”.
“Hulle is besig om Suid-Afrikaners in Botswana ’n slegte naam te gee. Ons kan nie bekostig dat mense sonder die nodige permitte hier kom jag nie.”
Die mans se dubbelkajuit-Ford is by die grenspos voorgekeer en deurgesoek. Beslag is gelê op die trofeë en die mans is deur die Botswana-polisie ondervra.
Die Botswana-polisie het gesê die mans was Dinsdagaand nog in dié land, maar dit kon nie bevestig word of hulle in aanhouding is nie.
– Volg Nuus24 op Twitter
- Beeld