President vra Christene om verskoning
2009-12-31 14:44
Dakar - Senegal se Moslempresident, Abdoulaye Wade, het dié land se Christene om verskoning gevra ná aanmerkings wat tot betogings gelei het, het die Senegalese nuusagentskap APS berig.
Wade het Maandag gesê dat Jesus Christus nie as God beskou word deur die land se meerderheid Moslems nie.
Jong Christene het Woensdag met veiligheidsmagte gebots in die hoofstad ná kardinaal Theodore Adrien Sarr, die aartsbiskop van Dakar, die regering daarvan beskuldig het dat hy Senegal se Christene beledig het.
Die president se seun, Karim Wade, wat ook 'n minister in die regering is, het om verskoning gevra namens die president.
"As die aanmerkings van die president van die republiek Senegal se Christene beledig het, vra ons hulle en die internasionale Christengemeenskap om verskoning," het Wade volgens APS gesê.
– SAPA