Pous: Nigeriese aanvalle 'absurd'
2011-12-26 14:42
Vatikaanstad – Pous Benedictus XVI het die bomaanval op 'n Nigeriese Katolieke kerk op Kersdag, wat die lewens van 35 mense geëis het, veroordeel en gesê respek en versoening – nie geweld nie – kan vrede bring.
Pous Benedictus het Maandag gesê hy het met "diepe hartseer" uitgevind van die "absurde" aanval op die St Theresa-kerk in Madalla.
Die Islamitiese ekstremistegroep Boko Haram het vir die aanval verantwoordelikheid geëis.
Dit was die tweede agtereenvolgende jaar wat die groep aanvalle op Kersdag uitvoer.
Benedictus het die wêreld gevra om vir die slagoffers en Nigerië se Christengemeenskap te bid.
"Op hierdie tydstip wil ek dit weer herhaal, met mening: geweld is 'n pad wat net lei na geweld, verwoesting en dood. Respek, versoening en liefde is die enigste pad na vrede."
– Volg Nuus24 op Twitter.
- Sapa - AP