Polisie bevry 21 Ugandese seksslawe
2011-10-18 13:53
Kuala Lampur – Altesaam 21 Ugandese vroue is gered van 'n sindikaat wat hulle gedwing het om prostitute te word, het die Maleisiese polisie gesê.
Dis die eerste sindikaat van sy soort in Maleisië wat slagoffers uit Afrika betrek.
Die vroue is Vrydag uit woonstelle in ‘n gebou net buite Kuala Lampur, die hoofstad, bevry, het die Federale Misdaad-ondersoekeenheid in ‘n verklaring gesê.
Die vroue, tussen die ouderdomme van 19 en 42, is na Maleisië gelok met beloftes van werk as skoonmakers in huise en hotelle. Pleks daarvan is die vroue gedwing om as prostitute te werk om hulle reiskostes af te betaal.
“Die slagoffers is fisiek en geestelik gedreig as hulle sou probeer weghardloop en by die owerhede kla,” luidens die verklaring.
Volgens die verklaring is al die vroue van Uganda, via China, na Maleisië geneem.
As hulle seks geweier het, is hulle geslaan en verkrag, het ‘n polisiebeampte gesê.
“Dit is die eerste keer wat ons so ‘n groot hoeveelheid Afrikane het,” het die beampte gesê. Hy wou nie sy naam bekend maak nie omdat hy nie toestemming gehad het om met die media te praat nie.
Hy het bygevoeg dat daar al voorheen gevalle was met individuele prostitute van Afrika, maar nog nooit ‘n groot groep nie.
– Volg Nuus24 op Twitter.
- Sapa - AFP