Personeel by Zambiese koerant staak

2012-07-16 21:05

Lusaka – Ongeveer 270 joernaliste en ander werkers by die staatsbeheerde Times of Zambia-koerant het Maandag begin staak en eis hul onbetaalde salarisse van verlede maand, het 'n vakbondbeampte gesê.

"Die situasie is dat werknemers wat aan vakbonde behoort het besluit om te staak nadat hul salarisse vir Junie nog nie betaal is nie," het Anthony Mulowa, president van Zambië se vakbond vir joernaliste, gesê.

"Die werknemers is bekommerd dit is amper die einde van Julie, en niemand is nog vir Junie betaal nie," het hy bygevoeg.

Mulowa het gesê die werknemers sal eers weer begin werk wanneer alle werkers wat aan vakbonde behoort, betaal is.

Die ministerie van inligting het onlangs bekendgemaak dat Times of Zambia amper bankrot is, en het die koerant se raad aangemoedig om met 'n strategie na vore te kom.

Maar die nuwe raadslede het onlangs nuwe maatskappymotors vir hul eie persoonlike gebruik gekoop.

Dít het personeellede woedend gemaak wat steeds vir hul salarisse wag.

– Volg Nuus24 op Twitter.

- Sapa - AFP